TVB今個禮拜啱啱播出肥貓鄭則仕擔正嘅《荷里活有個大老千》，大家都知「老千」、「出千」點解，但究竟點解「出千」要用個「千」字嚟表示出蠱惑、呃人？

關於「出千」嘅來源眾說紛紜，阿史就揀咗兩個比較合理嘅講法同大家分享吓。第一種說法話，「老千」呢個稱呼來自以前嘅馬吊，馬吊最初係一種紙牌，其中有「老千」、「老蓋」等牌型。而有啲地區規定，馬吊嘅紅花、老蓋、老千、一筒、一索、一萬等稱為「么」，集齊九個「么」就算贏。因此，喺打牌嘅時候，如果見到對家將「老千」呢個牌型丟出去嘅話就要特別小心喇，因為呢個現象好唔尋常，對家好有機會想出貓作弊。於是，「出千」、「出老千」就有喺賭局上出術嘅意思。

第二種說法就話「千」其實源自香港，係「cheat」嘅粵語音譯。「cheat」喺英文入面解欺騙、騙取人哋財物嘅人，「cheat」因為同「千」嘅粵語發音相似，就有咗「出千」、「老千」呢種講法。

原圖嚟自網絡。